פארן צום ש״ך 

דער אלטער שול פון העלישוי טראגט ביז היינט דעם נאמען פונעם ש״ך, וואס איז דא געווען רב — די שטאט רופט אים „Šachova synagoga“. ער איז אויפגעבויט געווארן נאך דער שריפה פון 1560, און שטייט קוים 70 מעטער פונעם בית החיים.

אין צענטער פונעם ביהמ״ד שטייט די בימה: אכטעקיג, ארומגענומען מיט א קינסטלעך-געשמידטן אייזערנעם גאלאדער (גראטעס) באקרוינט מיט א הויכער עטרה. די ווענט און די קופּאלן פונעם געוועלב זענען הערליך אויסגעפארבט און באצירט מיט מאלערייען פון בלומען, בעלי חיים און לענגערע תפילות בלשון הקודש — געמאלן אין די יארן צווישן תפ״ה און תצ״ז, לויטן ארטיסטישן „פוילישן“ נוסח. לויטן שטאָט-ראט איז דאס דער איינציגסטער ביהמ״ד פון דעם שטייגער וואס איז פארבליבן אומבארירט אין איר גאנצער פראכט פונקט ווי אמאל.

אויבן, אין עזרת נשים, געפינט זיך היינט דער שטאטישער מוזעאום מיטן נאמען „יהדות מעהרן“. אין א באזונדער שטיבל ליגן אויסגעשטעלט די הייליגע ספרים פונעם ש״ך — זעלטענע דפוסים ראשונים וואס די שטאט האט איינגעהאנדלט ביי אוקשאנס — אונטער א געמאלענער הילצערנער סטעליע נאך פון יאר תצ״ז. דער ביהמ״ד דינט היינט נישט אלס א מקום תפילה, און מען דאוונט דארט נישט קיין מנינים.