כִּי שִׂפְתֵי כֹהֵן יִשְׁמְרוּ דַעַת 

גרויס התרגשות און התרוממות הנפש הערשט צווישן גאנץ כלל ישראל בכל מקומות מושבותיהם, מיט די בשורה טובה ומרנינה וואס האט זיך בליץ שנעל פארשפרייט, אז די חשוב׳ע אייניקלעך פון מרן רבי שבתי כהן זי״ע, בעל הש״ך ונקודות הכסף על שולחן ערוך, גרייטן זיך אהערצושטעלן א פולשטענדיגע „בנין הכנסת אורחים“ אין דער שטאט „העלישוי“ אין „טשעכיי“ הארט נעבן דעם ציון המצוינת קודש הקדשים פון דעם הייליגן ש״ך זי״ע.

דער הייליגער ש״ך זי״ע איז באקאנט מיט די טיפזינע פירושים וואס ער האט ארויסגעגעבען אויף שולחן ערוך, יורה דעה און חושן משפט, דאס רעכנט אריין די חיבורים ש״ך, נקודת הכסף און קונטרס האחרון, וואו דער ש״ך איז זיך מפלפל מיט׳ן הייליגן טורי זהב זי״ע איבער דעם פירוש פונעם מחבר און רמ״א, און דאס מאכט א גרויסן נפק״מ וויאזוי מען נעמט אן להלכה.

גאנץ כלל ישראל אין אלע דורות טוען לערנען דעם הייליגן פירוש פונעם ש״ך, מען איז דן לעומקה של הלכה אין יעדן ווארט וואס דער הייליגער ש״ך האט געמיינט ארויסצוברענגען, און אויף יעדע זאך איז תילי תילים של הלכות וואס איז נוגע למעשה וויאזוי זיך צו פירן.

דער ש״ך איז נפטר געווארן אין גאר א יונגן עלטער און ער איז נקבר געווארן אין די שטאט „העלישוי“. נאך די פטירה פונעם ש״ך זי״ע איז זיין ציון הקדוש געווארן א ציאונגס קראפט פאר טויזנטער מענטשן פון איבעראל. אנשים נשים וטף זענען זיך געקומען משתטח זיין אויפ׳ן הייליגן ציון און עס איז געווען א מקום מקובל צו פועל׳ן ישועות ורפואות און אלעס וואס פעלט זיך אויס ברוחניות ובגשמיות.

זינט די צווייטע וועלט מלחמה זענען גאר ווייניג מענטשן געקומען צום בית החיים, און דער שטאט „העלישוי“ מקום מנוחת קדשו פונעם הייליגן ש״ך איז געשטאנען מער ווייניגער ליידיג, וויבאלד עס איז ארויס פון געגנט און עס איז נישט געווען אויסגעשטעלט פאר דעם, עס איז נישט געווען קיין בית המדרש און מקוה, ווער רעדט נאך פון א הכנסת אורחים צו אויפנעמען די געסט כראוי וכיאות.

גרינדונג פון „ועד הכנסת אורחים דרבינו הש״ך“

דאס אלעס האט זיך געטוישט מיט געציילטע יאר צוריק ווען די חשוב׳ע נכדי הש״ך האבן זיך צוזאמגענומען און האבן אינאיינעם אנגעהויבן ארבעטן להחזיר עטרה ליושנה, צוריקצוברענגען דעם אלטן גלאנץ און שיין צום ציון הקדוש, אז טויזנטער אידן פון איבער דער וועלט זאלן ווידעראמאל קענען אנהייבן קומען צו זיין ציון הקדוש און פועל׳ן ישועות ורפואות למען הכלל והפרט.

אין די לעצטערע יארן הערט מען כסדר אן א שיעור ישועות ורפואות וואס מענטשן פועל׳ן ביים ציון הקדוש פונעם ש״ך זי״ע ווי די צדיקי עולם פלעגן קומען מתפלל זיין נאך פאר די צווייטע וועלט מלחמה. די עסקנים הערן ממש טאג טעגליך וואונדערליכע ישועות וואס אידן האבן געהאט ביים פוקד זיין דעם ציון הק׳, פרנסה בריווח, זרע של קיימא, שידוכים, בריאות הגוף והנפש און אין אלע ענינים.

מען שליסט קאנטראקט אויף א געביידע

ווי נאר די עסקנים האבן זיך אריינגעלייגט אין דעם נושא האבן זיי געזען דעם ווארעמקייט וואס הערשט ביים ציבור צו קענען קומען מתפלל זיין אויפ׳ן ציון הקדוש איבער׳ן גאנצן יאר, זיי האבן זיך טאקע אריינגעלייגט צו טון וואס מעגליך אויפצוארבעטן דעם מקום קדוש, און בסייעתא דשמיא האט מען א קורצער צייט צוריק געשלאסן קאנטראקט אויף א געביידע און שטח הארט נעבן דעם ציון הקודש פונעם הייליגן ש״ך זי״ע.

אלע פעולות וועלן בעז״ה געפירט ווערן אונטער א חשובע ועד הרבנים נכדי הש״ך, בראש פון הגה״צ רבי אברהם הערש וואזנער שליט״א אב״ד סאטמאר מאנסי, הגה״צ רבי מיכל שטיינמעץ שליט״א דומ״ץ סקווירא, און נאך.